المن اتلوكَ الرئاسه !!

[أم خطاب]

المن اتلوكَ الرئاسه

المن اتلوكَ الرئاسه ؟ للكَضه بلندن حياته وما وكَع من ايده كاسه

للطلب حق اللجوء وما دره بهموم ناسه

للي ما نام بسواتر والقَصف ما وجع راسه

للي ما ضاكَ الحصار وضيم عشر سنين جاسه

للي ولده بجنه امريكا كَضوها واحنه ولدنا عل فانوس كملوا الدراسه

للي باكَــ وصار بالصدفه معارض وبالحرام انبنه ساسه

جم بطل عدنه انولد ما نعرف اسمه وصارت اهمومه سياسه

واخر الموديل صاعد اتحيطه دوريه حراسه

وصار مثل الديج يصرخ والرجل كلهانكَــــاسه

كيفت ؟؟؟ كيفت كلشي تغير ثاري هذا الصار اكبر انتكــاسه

الحرامي اليوم صار اكبر مناضل والشريف اعلن افــلاسه

والمناصب وزعوها عل كَرايب عل حبايب كلمن وحجمه وقياسه

انه اكَلك المن اتلوكَ الرئاااسه

اتلوكَ للي حضن كَاعه وما خذل فد يوم ناسه

اتلوكَ للي فكَدت عمود البيت وما باعت شرفها وبالركن حطت الطاسه

للكَضه عمره يتيم ولا رعاه احد ولا زنكَين باسه

اتلوكَ للي خسرت ابنها ولا كَبر ينزار والدفنه صارت بالجيــاسه

اتلوكَ للعنده عداله وطيب واخلاق وفراسه

ردت انشدك انت يل تقره القصيده المن اتلوكَ الرئاااااااااااسه

منقول

اكيد اللهجة البغدادية صعبة عليكم ان شاء الله تفهموها
عندما يتكلم العراقي في بعض الدول وخاصة في مصر العربية يقولوا له رجاء اتكلم عربي لأن اللهجة البغدادية صعبه عليه
للعلم انا منذ صغري اعيش في بغداد وهذه اللهجة صعبة عليه فانا الأصل من محافظة نينوى / الموصل اي من المحافظات التي تسمعون عنها في الفضائيات وعلى لسان الأخبار المثلث السني فهكذا قسم العراق وأصبح يطلق على محافظاته