مش بالمعونة هاتذلونا
تبيعوا وتشتروا فينا
ترهنوا سكاتنا بفلوسكم
أبعدوا عنا وسيبونا

مش مادين ليكم أيدينا
ولا فى أحضانكم أترمينا
دى شوية ارادة على عزيمة
والخير يغرق أراضينا

ونبدأها تانى طوبة طوبة
نجيبها من سيناء للنوبة
والخطوة كلها محسوبة
ما تفوقوا بقى من الغيبوبة
مصر جامدة ومش سهلة
مش هافية ولا مختلة
ولأى عقدة أهى حَِلة
واللى يمسها بكلمة
يادوب يكون ليها أكلة

مش ساقية فيها هانتربط
ونمشى بمزاجكم ونتظبط
الساقية للى يشبهكم
دى عروسة الشرق الأوسط

طول عمرمصرمعروفة
ولا يوم تقف كده مكتوفة
وطول عمرها رأس الخيمة
ولا بتنحنى ولا مكسوفة
من غير لا كانى ولا ماني
مش محتاجينكم خلاص تاني
وحقنا بأيدينا نأخده
لو حتى من كوكب تاني

وبكرة تشوفوا مصر جديدة
منورة الدنيا علينا
على الأرض ثابتة وشديدة
واللى مايعرفش يعرف
يقرأ فى تاريخها ويتعلم
هيا اللى جد وأكيدة

مش أغانى ولا تأليف
كلام بجد ومش تحريف
واللى يقول ...
ما أعرفش أنا مصر
ده مجنون وكلامه تخريف

مصر بيا وبولادها
ربنا حارصها وصاينها
وفى كتابه الكريم ذكرها
ومع بعض نعلا وهانعمرها
عيشنا وأتربينا فيها
لو أخر لحظة فى عمري
أموت أنا وأفديها
ربنا يكتر فى خيرك
يا أم الدنيا وأحلى ما فيها

المصدر
اليوم السابع