اعتذار للحكومة

اعتذار للحكومة


أنا مكسوف منك يا حكومة

أنا ظالم وأنت المظلومة

الغلا مش منك يا حبيبتي

كله من أيدي المخرومة

أنا آسف على أيدي السايبة

على نفسي الطماعة الخايبة


اكمني ما بادفعش ضريبتي

واتحجج بهدومي الدايبة

والفقر ده عذري المكشوف


افرض حتى الأسعار نار

مش لازم لحمة ولا خضار

ولا سمنة ولا جبنة يا بنتي

بلا عيش بلا قوطة بلا خيار



أنا آسف وفي غاية الغم

كان نفسي اتبرع بالدم

بس منين اديك يا ستي

هو انا فرخة ولا خروف

يا حكومة أنا منك مكسوف


د. ألفريد حبشي
شبرا - القاهرة

النقد الساخر ..رائع جداً
يضرب على الوتر الحساس دون ان يصل اليه مقص رقيب

: )

جميله هذة الابيات الناقدة فى شكل زجل ابيات رائعه سلمت يداك