طه امين يكتب: لسه ماجاش وقت البكا

ف بلادنا فى آخر الصعيد
لما الولد بيموت شهيد
برصاصة غدر من العدا..
لا نقيم عزا.....و لا فيه عديد
و لا أمه تطلع فى الخلا و تصرخ:
"يابوى ...و لدى انقتل"

نسدل ستار الصمت فوق كل البلد
نسكت و نشكى للسما
نرفع عنينا المحروقين
و نناجى نجمات المسا
و نشهِّد الليل و القمر ...
مهما يطول بينا الزمن
دم الشهيد مايروح هدر
ونراقب العدو اللى حارق قلبنا
ونسير ورا ذنبه بلا لحظة كلل

ولما يلقانا النصيب...نصبح طوفان
نهدر كما هدر الطوفان....
نجرى و ناخد حقنا...
و نطهر الارض اللى بارك ربنا
اركانها و جنودها و علَّا اسمها
من كل ظلم وجهل وجهالة وطاغوت
نجرى كما يجرى الطوفان
نحفر نهور..
ينبت على ضفافها النخيل
نخلة علاء ....نخلة سمير
نخلة ميشيل....مجدى...وسالى
و انتصار....نخلة رحاب ...
نخلة مُحمد و المسيح
نخل الشهيد....خالد سعيد
بستان كبير....سيد بلال...
والنخل يطلع من حشاش الأرض يتمايل و يهزج ف افتخار
يسجد لرب الكون و يشكر نعمته
نرفع ادينا للسما....شكراً يارب...
نمسح عرقنا بفرحنا......
و ينده آذان.......نوقف نصلى على الشهيد
ينده آذان...ناخد العزا
يطلع نهار..نرجع هنا ف نفس الميدان
نسند ضهورنا التعبانين
على حْطَان المجمع..كِيفْ زمان
و نبُص فى عيون بعضنا
و يمر نهر الذكريات..
تدمع عيونَّا ف صمتها
و ساعتها بس يكون حلال
إن الرجال..تبكى على شهدا الوطن.